மனநலிவு நோயால் பாதிக்கப்பட்ட இளம் காதலர்கள் டேட்டிங் செல்லும் வீடியோவுக்கு அமோக வரவேற்பு

டவுன் சிண்ட்ரோம் எனப்படும் மனநலிவு நோயால் பாதிக்கப்பட்ட மாணவனும், மாணவியும் காதல் வயப்பட்டு டேட்டிங்குக்கு செல்லும்போது அவர்களை உறவினர்கள் வாழ்த்தி, வழியனுப்பும் வீடியோ இணையத்தில் சூறாவளியாக பரவி வருகின்றது.

வழக்கத்துக்கு மாறாக முக அமைப்பில் குறிப்பிடத்தக்க மாற்றம் கொண்ட குழந்தைகளை நாமும் கடந்து சென்றிருப்போம். அவர்களை மனநலக் குறைபாடுள்ள குழந்தைகள் என்றே பெரும்பாலோர் நினைக்கிறார்கள். அது தவறு, இது மரபணுக் கோளாறால் ஏற்படுவது. 

தட்டையான முகம், சரிவான நெற்றி, கண்கள் மேல்நோக்கிச் சாய்ந்திருத்தல், தட்டையான சிறிய மூக்கு போன்ற அடையாளங்களுடனோ அல்லது இவற்றில் ஒன்றிரண்டு அடையாளங்களுடனோ இவர்கள் இருப்பார்கள். இவர்களுடைய பிரச்சனை, டவுன் சிண்ட்ரோம் என்ற குறைபாடு. இவர்களுடைய புறத்தோற்றமும் உடல்மொழியும் மனநலப் பாதிப்பு உடையவர்கள் என்று தவறான புரிதலை ஏற்படுத்துகின்றன. 

டவுன் சிண்ட்ரோம் ஒரு நோயே அல்ல. இது ஒரு குறைபாடு. போதிய மருத்துவ ஆலோசனையும் சிகிச்சையும் பெற்றால், இவர்களும் மற்றவர்களைப்போல் ஓரளவுக்கு இயல்பாக மாற முடியும். 

பொதுவாக நம் உடலில் இருக்கும் ஒவ்வொரு செல்லிலும் மரபுப் பண்புகளை உள்ளடக்கிய குரோமோசோம்கள் இருக்கும். வலைப்பின்னல் அமைப்பில் இருக்கும் இவை, ஒவ்வொரு செல்லிலும் 23 ஜோடி என்ற எண்ணிக்கையில் அமைந்திருக்கும். கரு உருவாதலின்போது தாய், தந்தையிடம் இருந்து பெறப்படும் 23 குரோமோசோம்கள் இணைந்து, புதிதாக 23 ஜோடி குரோமோசோம் அமைப்பு உருவாகும். 

இந்தக் குரோமோசோம் இணைவின்போது தாய் அல்லது தந்தையிடம் இருந்து பெறப்படும் 21-வது குரோமோசோமுடன் அதன் நகலும் கூடுதலாகச் சேர்ந்துவிடும். இதனால் 46 குரோமோசோம்களுக்குப் பதிலாக, ஒவ்வொரு செல்லிலும் 47 குரோமோசோம்கள் இருக்கும். குரோமோசோம்களின் இந்தப் பிறழ்வுதான் டவுன் சிண்ட்ரோம். இந்தக் குறைபாடு உடைய குழந்தைகளின் உடல், மன வளர்ச்சியில் மந்தத் தன்மை இருக்கும் என்பதால் தமிழில் இது மனநலிவு எனப்படுகிறது.

இவர்களுக்கு இயல்பான தசை உறுதி குறைந்து, தளர்வாக இருக்கும். பிறக்கும்போதே எடை குறைவாகவும், உடல் நீளமாகவும் இருக்கும். தலை, காது, வாய் போன்ற உறுப்புகள் வழக்கத்தைவிட சிறிதாக இருக்கும். காதுகள் வளைந்தும், நாக்கு துருத்திக்கொண்டும் காணப்படும். 

மூக்குத் தட்டையாகவும் கண்கள் மேல்நோக்கிச் சரிந்தும் இருக்கும். உள்ளங்கையில் மடிப்பு போல ஒரே ஒரு பெரிய ரேகையுடன், கை அகன்றும் விரல்கள் குட்டையாகவும் இருக்கும். மனநலிவு கொண்ட குழந்தைகளின் உடல், மன வளர்ச்சி மற்றக் குழந்தைகளைவிட குறைவாகவே இருக்கும். இந்தக் குழந்தைகள் தவழ்வது, உட்காருவது போன்றவற்றை செய்ய மற்றக் குழந்தைகளைவிட இரண்டு மடங்கு அதிகக் காலம் எடுத்துக்கொள்வார்கள். 

"டவுன் சிண்ட்ரோம்" குறைபாடுள்ள குழந்தைகளின் அறிவுத்திறன் மற்ற குழந்தைகளைப்போல் முறையாக வளர்ச்சியடைவதில்லை. இதன் காரணமாக சாதாரண பள்ளிகளில் அவர்களால் படிக்க முடியாது. இங்கிலாந்தில் 1981-ம் ஆண்டிலிருந்தே இக்குறைபாடுடைய குழந்தைகள், சாதாரண குழந்தைகள் பயிலும் பள்ளிகளில் படித்து வருகின்றனர். 

இப்படி, அமெரிக்காவில் உள்ள ஒரு பள்ளியில் படித்துவரும் "டவுன் சிண்ட்ரோம்" குறைபாடுள்ள மாணவரான டெரன்ஸ் மற்றும் அவரது வகுப்பு தோழியான டி’ஸுவர் ஆகியோர் பள்ளி இறுதியாண்டு தேர்வு முடிந்து 'புராம்' எனப்படும் டேட்டிங்குக்கு போகும் நிகழ்ச்சிக்கு இருவரின் உறவினர்களும் வாழ்த்தி, வழியனுப்பும் நிகழ்ச்சி வீடியோவாக படம்பிடிக்கப்பட்டு சமூக வலைத்தளங்களில் சுமார் 25 லட்சம் மக்களிடையே பலத்த வரவேற்பை பெற்றுள்ளது.