கொமர்ஷல் வங்கி அண்மையில் கண்டியிலும் குளியாப்பிட்டியிலும் மத்திய மற்றும் வடமேல் மாகாணங்களை சேர்ந்த சுமார் 260 தொழில் முயற்சியாளர்களுக்கு கருத்தரங்குகளை நடத்தி உள்ளது. நுண் சிறிய மற்றும் நடுத்தர தொழில் முயற்சிகளை வலுவூட்டுவதன் மூலம் தொழில் முயற்சி அபிவிருத்திகளை நாடு முழுவதும் ஊக்குவித்து வரும் கொமர்ஷல் வங்கியின் செயற்றிட்டத்தின் ஒரு அங்கமாக இந்நிகழ்வுகள் இடம்பெற்றன.
“திரிபல வியாபார புபுதுவ” என்ற வங்கியின் வேலைத்திட்டத்தின் மூலம் தொழில் முயற்சி ஆற்றல் மற்றும் அபிவிருத்தி செயலமர்வுகள் இடம்பெற்று வருகின்றன. குளியாப்பிட்டிய, நாத்தாண்டிய மற்றும் பன்னல ஆகிய இடங்களின் கொமர்ஷல் வங்கி கிளைகளால் தெரிவு செய்யப்பட்ட 125 தொழில் முயற்சியாளர்கள் குளியாப்பிட்டியவில் இடம்பெற்ற கருத்தரங்கில் பங்கேற்றனர்.
வங்கியின் கட்டுகஸ்தோட்டை, பேராதெனிய, பிலிமத்தலாவ, அக்குறணை, கண்டி நகர், மாத்தளை, திகன ஆகிய கிளைகளால் தெரிவு செய்யப்பட்ட சுமார் 135 பேர் கண்டியில் இடம்பெற்ற செயலமர்வில் பங்கேற்றனர்.
கூட்டாண்மை பயிற்றுவிப்பாளரும் ஆலோசகருமான தர்ஷன வெளிகல குளியாப்பிட்டி நிகழ்ச்சியில் வளவாளராக பங்கேற்றார். கொமர்ஷல் வங்கியின் வட மேல் பிராந்தியத்திற்கான பிராந்திய முகாமையாளர் அமல் அலஸ், குறிப்பிட்ட வங்கிக்கிளைகளின் கிளை முகாமையாளர்கள் மற்றும் கடன் அபிவிருத்தி பிரிவின் அதிகாரிகள் ஆகியோரும் இதில் பங்கேற்றனர். பயிற்றுவிப்பாளரும் தொழில் முயற்சி ஆற்றல் அபிவிருத்தி ஆலோசகருமான சந்தன குணவர்தன வளவாளராகப் பணியாற்றினார். கொமர்ஷல் வங்கியின் சிரேஷ்ட பிராந்திய முகாமையாளர் தெலக் ஷன் ஹெட்டியாராச்சி, வங்கிக்கிளைகளின் கிளை முகாமையாளர்கள் மற்றும் கடன் அபிவிருத்தி பிரிவின் அதிகாரிகள் ஆகியோரும் இதில் பங்கேற்றனர்.
நுண் சிறிய மற்றும் நடுத்தர தொழில் முயற்சியாளர்களுக்கான இத்தகைய செயல் அமர்வுகளை வங்கி ஏற்கனவே நாரம்மல, காலி, மொனராகலை, வெள்ளவாய, பதுளை, பசறை, பண்டாரவளை, வெலிமடை, வெலிகம, கொக்கலை, கராப்பிட்டிய, மாத்தறை, மட்டக்களப்பு, அம்பாறை, குருணாகல, யாழ்ப்பாணம், வவுனியா மற்றும் ஹிங்குராங்கொடை ஆகிய இடங்களில் ஏற்கனவே அண்மைக் காலங்களில் நடத்தியுள்ளது.
வங்கியின் விவசாய மற்றும் நுண் நிதி சேவைப் பிரிவுகளில் இரத்தினபுரி, நாரம்மல, கண்டி, அனுராதபுரம், கிளிநொச்சி, பண்டாரவளை, வெள்ளவாய, ஹிங்குராங்கொடை, கலேவல, அச்சுவேலி, வவுனியா மற்றும் திஸ்ஸமகாராம ஆகிய இடங்களில் அமைந்துள்ளன. புதிய வர்த்தக முயற்சிகளை தொடங்க அல்லது இருக்கின்ற வர்த்தகத்தை விஸ்தரிக்க உதவி தேவைப்படுகின்றவர்களை அடையாளம் கண்டு இந்தப்பிரிவுகள் உதவி வருகின்றன. தமது வர்த்தகத்தை எவ்வாறு விருத்தி செய்வது அல்லது எதிர்நோக்கும் பிரச்சினைகளை எவ்வாறு தீர்த்துக்கொள்வது என்பன போன்ற விடயங்களிலும் உதவிகள் வழங்கப்பட்டு வருகின்றன.
2011 முதல் கொமர்ஷல் வங்கியின் தொழில் முயற்சி ஆற்றல் அபிவிருத்தி வேலைத்திட்டங்கள் மூலம் நாடு முழுவதும் உள்ள 2100 சிறிய மற்றும் நடுத்தர தொழில் முயற்சிகள் நன்மை அடைந்துள்ளன. புதிதாக நடத்தப்பட்ட செயலமர்வுகளில் மாற்றங்களுக்கான அவசியம் சிலவேளை சிறிய மற்றும் நடுத்தர தொழில் முயற்சிகள் ஏன் தோல்வி அடைகின்றன? வர்த்தக உலகில் சவால்களுக்கு எவ்வாறு முகம் கொடுப்பது, தொழில் முயற்சியாளர் கடைப்பிடிக்க வேண்டிய கட்டாய விதிமுறைகள் என்பன பற்றி விரிவாக ஆராயப்பட்டது.
0 Comments