ஆப்பிள் நிறுவனத்தின் சிரி மூலம் இயங்கும் முதல் ஸ்மார்ட் ஸ்பீக்கர் கடந்த ஆண்டு அறிமுகம் செய்யப்பட்ட நிலையில், விற்பனை குறித்த அறிவிப்பு வெளியாகி இருக்கிறது.
ஆப்பிள் நிறுவனத்தின் சிரி (வாய்ஸ் அசிஸ்டண்ட்) மூலம் இயங்கும் தனது முதல் ஸ்மார்ட் ஸ்பீக்கரை கடந்த ஆண்டு ஜூன் மாதம் நடைபெற்ற ஆப்பிள் டெவலப்பர்கள் மாநாட்டில் அறிமுகம் செய்திருந்தது. ஆப்பிள் ஹோம்பாட் என அழைக்கப்படும் புதிய ஸ்மார்ட் ஸ்பீக்கர் கடந்த ஆண்டு டிசம்பரில் விற்பனைக்கு வரும் என ஆப்பிள் அறிவித்தது.
எனினும் விற்பனை இந்த ஆண்டின் துவக்கத்திற்கு தள்ளிவைக்கப்பட்டது. முதற்கட்டமாக ஆஸ்திரேலியா, லண்டன் மற்றும் அமெரிக்காவில் ஆப்பிள் ஹோம்பாட் விற்பனையை துவங்க ஆப்பிள் திட்டமிட்டுள்ளது. அதன்படி புதிய ஹோம்பாட் விற்பனை பிப்ரவரி 9-ம் தேதி துவங்குகிறது. ஹோம்பாட் வாங்க விரும்புவோர் இதனை ஜனவரி 26-ம் தேதி முதல் முன்பதிவு செய்ய முடியும்.
7.0 இன்ச் உயர ஹோம்பாட் சாதனத்தை முழுக்க முழுக்க குரல் மூலமாக இயக்க முடியும். ஆப்பிள் நிறுவனத்தின் வாய்ஸ் அசிஸ்டண்ட் சேவையான சிரி மூலம் கட்டுப்படுத்தக்கூடிய வகையில் ஹோம்பாட் வடிவமைக்கப்பட்டுள்ளது. இசையை ஒலிக்க செய்வது, செய்திகளை வாசிக்க செய்வது மற்றும் வீட்டில் உள்ள மற்ற சாதனங்களை (இண்டர்நெட் மூலம் இணைக்கப்பட்டவை) ஹோம்பாட் மூலம் வாய்ஸ் கொடுத்தே கட்டுப்படுத்த முடியும்.
மேலும் இதில் வழங்கப்பட்டுள்ள ஸ்பேஷியல் அவேர்னெஸ் (spatial awareness) அம்சம் ஸ்பீக்கர் வைக்கப்பட்டுள்ள இடத்தை அறிந்து கொண்டு ஒலியை தானாக அட்ஜஸ்ட் செய்யும். ஆறு மைக்ரோபோன்கள் வழங்கப்பட்டிருப்பதால் மிக எளிமையாக இதனுடன் உரையாட முடியும். இத்துடன் அதிகளவு உரையாடும் போது பயனர் அடிக்கடி பயன்படுத்திய வார்த்தைகள் மற்றும் உத்தரவுகளை நினைவில் வைத்துக் கொண்டு அதற்கேற்ப ஹோம்பாட் சரியாக பதில் அளிக்கும்.
ஆப்பிள் நிறுவனத்தின் A8 சிப்செட் மூலம் இயங்கும் ஹோம்பாட் சாதனத்துடன் வாடிக்கையாளர்கள் மேற்கொள்ளும் உரையாடல்கள் அனைத்தும் சாதனத்தில் புரிந்து கொள்ளப்பட்டு அவை முழுமையாக என்க்ரிப்ட் செய்யப்படுகிறது. ஆப்பிள் வடிவமைத்த பெரிய ஊஃபர் வழங்கப்பட்டிருப்பதால் அதிக துல்லியமான ஆடியோ அனுபவம் வழங்குகிறது.
வெள்ளை மற்றும் ஸ்பேஸ் கிரே என இரண்டு நிறங்களில் கிடைக்கும் ஆப்பிள் ஹோம்பாட் அமெரிக்கா, லண்டன் மற்றும் ஆஸ்திரேலியா உள்ளிட்ட நாடுகளில் ஆப்பிள் அதிகாரப்பூர்வ வலைத்தளம் மற்றும் ஆப்பிள் ஸ்டோர் செயலி மூலம் முன்பதிவு செய்ய முடியும். சர்வதேச சந்தையில் ஆப்பிள் ஹோம்பாட் விலை 349 டாலர்கள் (இந்திய மதிப்பில் ரூ.22,260) என நிர்ணயம் செய்யப்பட்டுள்ளது.
இத்துடன் தேர்வு செய்யப்பட்ட ஆஃப்லைன் விற்பனை மையங்களிலும் ஆப்பிள் ஹோம்பாட் விற்பனை நடைபெறுகிறது. முதற்கட்டமாக மூன்று நாடுகளில் விற்பனை செய்யப்பட இருக்கும் ஹோம்பாட் மற்ற நாடுகளின் விற்பனை தேதி சார்ந்த தகவலை ஆப்பிள் ரகசியமாக வைத்திருக்கிறது.
0 Comments